Mark 14

Yesu Kun-kun Nwo Wan-wan Yi

1Paska zhin sa ɓei ce anyi, pyei ngnu aba agmada n na Yahudawayi zhin eyeye, ɓai gyi bredi n tna yist fiyi. A malami adna gmayi n na Yahudawayi atukwoda yi, ɓa ɓei zan zokwo shin shi ɓa ɓa wan Yesu fye-a ɓa wu wo.

2Ɓa cige, “Ama yita wan Wo n Paska sayin, sakun anya lakala dna na za tasin.”

3Yesu ɓei dna n Baitanya kpa, n Siman nayiwun-yi puwa. N na wyeshe nyagyi sa yi, nyikwoza ho wa ɓe n ʼmi nakwoyi kwalba yi shi. Wa kpe koya wa ze ko ya kpe Wo n Wo tukwo.

4– 5Azaho n ɓa ɓei gnikpe Woyi na nyagyiba, to ca daɓam, ɓa kwo ze nya wun-ya. Ɓa gna, “Ai kwo ɓo bmiya ha knu emiye na gyiwyei mwa a ga asan-yi.”

6Ama Yesu wa ciɓa ge, “Fye fawo, kninu zhin fyei gna wo gnagna shi wa zhin Mi ɓo manayi a? 7Fye na san-yi dayi lo mwa n fye yi ɓai yefye bmazhin. Fye ɓa mi fya bma ɓa zhin sanu fya ye cei. Ama safyewyi Mi ta je knusun n fye yin.

8“Wo kuɓo zhin shi wo ɓami, wo ku emi shin Mi nayi kafin Emi bi wyi. 9Ma gnafye gaiciya, aba vinya n na ɓa zhin Nabari Manayi ye wazi, ɓeye n nyikwoya zhin nyi, aɓa pa ce ai ciwo.”

10N navun, Yahuda Iskariyoti Yesu bara, walo a pirist tukwoda aba wa pagbe nɓai, shiwo ɓa knu Yesu.

11Sa na Pirist tukwoda ɓei wo nya kwa ɓe woyi, ca woɓa, ai daɓanjesun, ɓa zhin wo alkawali ge ɓa ɓa gawo lada, ntu cenu wa ya aba wyedna n sayi n wo ɓa knu Yesu. 12Ewyi kmisunyi na zhin paska cei nyi ʼwyi na wu a kugya ai zhin hadaya ceyi nyi, O wo abara ɓa nyawo aba n Wo cei pma ɓa gyi paska fi. 13Wa tnu ɓai gnu-aba ɓalo Urushelima ɓa zhin aba shiri. Wa gna ɓa ge, “Shi fyelo, fye ɓo gye zanugbai woi ɓe n nuwan shaknu yi tu, fya viwo. 14Puwa nwa lo, ‘Eyi gna puwada, ʼFye Dagayi na tnu n yi ya gye nyaknu n ho cei gni, ya ɓe ya gyi paska fi wyeshe yi.’ 15Wo ɓa lo fyei n nyaknu-she-nya dnagmayi n zhanba gni, fye shirya n yi paska yi ɓo.”

16Owo abara n gnu-aba ɓa knuya lo zhi mi ɓa lo ɓa gye nyaho-nyahoyi n shirya gni shi Yesu ɓei gna ɓa, ɓa shirya n paska yi.

17Nwyeshei Yesu wa kma ɓe ngnisun n Wo abara jei. 18Shi ɓa ɓei kpe n tebur ɓai gyi nyagyi, Yesu wa cige, “Ma gna fye, ɓehinhin zaknayi fyemi ɓa knu Mi, Zaknayi n fyemi n wo dnalo ya woi gyi nyagyi Miyi.”

19Bugba wunɓa vinya shi ɓa ɓei wo lonu ɓa ya wo nya gmanyi gmanyi. “Emi nu?”

20Wa dnaɓo gbe ge, “Zaknayi n fye awocei aba mi nu woi gni nyagyi gyi lo n Miyi n sayi ye. 21Tilas Ma fi shi a anabi ɓei da tunyi n sapai, ama, aiya, wahala yakwo shilo n za ba nwo ye wa knu Mi nyi. O! Ngye to aye ma zayim.”

22She ɓa ɓei kpe ɓai gyi nyagyi, Yesu wa la bredi Wa gyi Shekwoyi wye Wa tu kwo anabarka. Wa sakwo ya Wa gaɓa Wa cige, “Fye gyi Emi nayi nu.”

23Wa pmi Wa la kofi Wa zhin Shekwoyi godiya, Wa gaɓa ɓa sin n kwomi oɓa vinya. 24Wa gnaɓa ge, “Ema mi na zeya ntu naza begye ɓo, alkawali woiwoyi nu n Shekwoyi atasin n ʼzanyikwo-ciyi. 25Minu gnafye, Mi taje nuwan shushuyi sin m, sai ewyi Mi ɓei sin odo nkwo kakwo dulo n Shekwoyi Bemi.”

26Ɓa pmi ɓa kwo anyi, ɓa lo Zaitun pe.

27Yesu wa gnaɓa, “Efye vinya, fye ɓa ya Mi, ntuge Shekwoyi ɓo ku da na anabi gbe, ‘Miɓei wu kniknayi, a kni ye busi.’ 28Ama sa Mi ɓei la laka n ʼvingwo, Mi ɓei lo Galili Miyi sun n fyei ɓo.” 29Bitrus wa gna Wo ge, “Ko azaje ya Ho, mida ta ya Hom!”

30Yesu wa cige, “Bitrus, Kafin Pise nugba ɓei ceku bwa bayi nsu n labmi yi, hoi la Ma ɓona abwa-ta.”

31Bitrus wa dnaɓo gbe n kalayi wa cige, “Awo, ko n fi yi, mita na Ha ɓom.” Aza je vinya ɓa bwa da lonu ce. 32Sa fyewyi ɓa si ashinwan nu-nu fwa ho, Ayi kwo ge Jesimani, Wa gna Wo abara ge, “Fye pmi Mi zhi ʼya, Malo Mi zhin aduwa.”

33Wala Bitrus, n Yakubu yi n Yohana yi, ɓa gnilo n Woi. Waya bugba wun n mwa, n kala yi. 34Wa ci ɓa ge, “Emi bugba la wunya har efi, fye ku zhi ya fya gu n gnisun Miyi.”

35Wa ce tala lo fyewyi Wa ca kwo-kwo shi n kni Wa zhin aduwa ge, n gye ko ɓa wozhin, esa nukwoyi nkwo shi wa ʼbye nyi, tokwa ɓem.

36Wa cige, “Dada, Dada nyaho-nyahoyi to dnaɓo Ha bam, la kofi (azhin) ye laya Maba Ama Miye Oho ɓeye nu, to ge eminyan m.”

37– 38Wa pmi Wa jezeɓe Owo abara ngnu ata-yi aba, Wa gye ɓaku wangye. Wa yi, “Siman! Fye wangye nu? Ashe Fye ta mi fya gu n Miyi kwo esa gmanyi m? Fye gu ngnisun Miyi, fya-zhin aduwa saknu jaraba-dnayi wa dufye kala. Ko shikwo nyi zafun ceyi yelo, nayi zhin kalagbayi nu.”

39Waje laka lo Wa zhin aduwa Wa gyiwye shi Wo ɓo shin gyi nyi. 40Wa jezeɓe Wa gye ɓai wangye, ntuge aɓeyi ku ɓa ɓe. To ɓa kpe ɓeye ɓa ɓa dam.

41Shi Wo ɓei jezeɓe daɓa bwatayi, Wa ciɓa ge, “Fye wan gye, fye sun! Ama awo, gyewansa ladiya! Fye gye! Ala Mi knu na za nukwoyi aknu. 42Fye ɓe! Fye kukala! Tilas yalo! Gyewye! Emiknuyi laɓe!”

43Nsayi-sayiyi Wo ye gni Woi daɓo, Yahuda (zaknayi n Wa bara) wa ɓe na zayi vi n na knu kaya yi shi, abeyakwo, n na busi gbaknu yi, n na pirist tukwoda n na Yahudawayi tukwo da ɓei tnu ceyi. 44Yahuda ɓei ku gna ɓa, “Fye ɓei kpe ʼza ye nfye ɓa wan, sanu mi ɓei lo mi ɓiwogna miyi powa ʼbwa. Fyeyi wan Wo n ʼsayi n tna ɓednayi.” 45Sanu ɓa ɓei kusi, wa lo Yesu aba wa cige, “Dagayi,” wa shepmawo n gye nugnudo. 46Nsayi laza wan Yesu ɓa Wo shi kpam. 47Ama zaho (Bitrus) wa wa beyakwo wa ka Pirirst dnagmayi bara tnubua ya ceyi.

48Yesu wa nya ɓa ge, “Mi zhin evi yakwo nu fyei ɓe Ma ba n na kun kaya yi shi fya wan Mi? 49Knihin nu ɓo zhin to fya wan Mi dna na duwa nyaknu ma? Mi ɓei dna ɓo Miyi wu nya fyegyi-fyegyi. Ama aɓeye zhin n na bai ɓa nu alɓeda n na ɓei da tu Mi tukwo nu.”

50Nsa deye mi Owa bara yi la busi vinya. 51– 52Ama samari ho ɓei vi ɓa laɓa navun dna na gyewan jekpe. Sa na ʼza ɓeye ɓa wanwo, wa busi, Ko shi ko nyi owo aje ɓo la saya, wa busi n ɓwotolo yi.

Bitrus Wa Na Yesu Aɓo

53Alo n Yesu yi n pirist yako puwa aba na pirist tukwo da aje nna Yahudawayi tukwoda yi ɓei yefi. 54Bitrus ɓei viɓa n navun n kpayi wa wyi-ya fya-a wa lo dna pirist Yakwo dugwe wa ce akwo-kwo shi nna naba ɓedo nwa barayi.

55Nmi, a pirist tukwoda, n na Yahudawayi padawa yi ɓai fi ɓai zan Yesu laifi zanyi n ko kunce a zun wo kni a wuwo. Ama to ɓa min. 56A saida-da akatayi ɓa ɓe, ama ɓa daɓo n gmaje gmi-gmiyi.

57Nkmasun, a zaho ɓa ku kala ɓa ce kata fyiwo ɓa cige, 58“Yi ɓei ku wo woi cige, ‘Mi ɓa mi aduwa nyakun ya n kwo mi gni n naza ʼbwayi nyi, dna anyipyei gun ata maje odo mi n nato mi n naza abwa yim.’ ” 59Duddu lonu ɓeda ɓei mbai gmaje gmi-gmiyi.

60Pirist dnagmayi wa laka wa nya Yesu ge “Hota dna ɓe gbe nna da tu nho tukwo nyin?”

61To Yesu wa dnawo ɓegbem Prist yakwo wa nyawo ge, “Eho nu zhin Kristi, Shekwoyi Nugun?”

62Yesu wa cige, “Eminu. Fye ɓei gye mi sase-tu a Shekwoyi bwayi zhe bwa, mi i je ze ɓe anyi dna n mwa-mwa.”

63– 64Pirist yako, wa sawo aje ya wa cige, “Yi shan knihi yeʼa? Knihi nu zhin yi pmi a saida-da n shan san? Fye kuwo Wo ɓeda nukwoyi tukwo mwa nya. Fye zun owa ya gena?” Ada viyan ge a wuwo.

65Nsayi azaho ɓa ya kni-kni kpewo, ɓa puwo je n nawye, ɓa yawo lu n nawyeba n na knuyi. Ɓai nyawo ge, “nyika na lu hoa, Oho Anabi? Ɓai kpewo agye.” Har ma awadayi atnu-tnu loyi ɓa lo woi ɓai gwo wo apmikni n na wyeba.

66– 67Ɓitrus ɓeye dna n dugwe Ɓinyi-kwoyi ho n wo zhin tnu-tnu n pirist yakwo yi wa gye Bitrus shi woi wyena. Wa shi wo awye zun wa cige, “ho ɓei gnisun n Yesu yi n wo gmi n Nazarat nyi.”

68Bitrus wa naɓo, “Mita kpe ɓeye lo n ho dam!” Wa gmi ya lo a duba. Safewyi pise nugba ceku.

69Ɓinyikwoyi wa gye wo gni ɓo wa ya azaje gna, “n Wo gni nu! Yesu bara gni!”

70Bitrus wa naɓo n jesun. Safyewyi aza mɓa ɓei zhi nna nawye ba, ɓa ya Bitrus gna, “ho zhin oɓa zanu, ntuge ho gmi n Galilinu!”

71Waya a kmikni woi sinya-si, “Mi ta kpe za deye ye lo nfye zhi fyei dawo ɓe nyim.”

72Nsayi-sayi yi pise nugba ceku, bwa bayi.

Nsagmanyi yi wa pa Yesu ɓeda ɓo, “Kafin Pise nugba ceku a bwa aba, ho ɓa namaɓo, abwa-ta.” Wa ya bwici.